蘇永康自拍剪臍帶 Dicky:驚佢剪錯子孫根

facebook twitter google
Deborah 318 2021-05-08 綜合

蘇永康

【東方日報專訊】今年9月就50歲的蘇永康老來得子,太太馮翠珊前晚為他誕下近7磅重「慈姑椗」。身為新手爸爸的蘇永康自爆手忙腳亂,張衞健(Dicky)、梁漢文(Edmond)戥老友開心之餘,不忘取笑「蘇爹哋」,Dicky驚他剪臍帶時「矇查查」錯手將B仔的「子孫根」當臍帶剪。Edmond則爆電子白癡的蘇永康不懂得用相機拍低太太產子重要時刻,好彩「蘇爹哋」叻番次,雙手靈活得邊剪臍帶邊影相,簡直「妙手仁心」上身,Dicky更高呼:「BIG FOUR有後喇!」

蘇永康(阿公)一索得男,老婆馮翠珊(Anita)前晚為他誕下「慈姑椗」,據知Anita開刀生產,BB近7磅重,是個大頭BB。榮升老竇的阿公親自報喜:「多謝大家關心,小弟的確係榮升咗老竇級啦,母子平安,BB好可愛。第一次做爹哋,心情當然係非常非常感動同開心,新手上任,有點手忙腳亂,所以請容許大家畀少少時間我,過兩日等我安定下來,先同大家分享我的喜悅!」

一手摣鉸剪 一手摣手機

蘇永康3個「BIG FOUR」好兄弟張衞健(Dicky)、梁漢文(Edmond)和許誌安第一時間送上祝福,Dicky戥阿公開心得連講6次「好感動」,他笑說:「我哋BIG FOUR幾個都好忙,Edmond同太太去咗旅行,所以我老婆(張茜)做咗代表陪Anita入院生,我忙到半夜返去睇視頻,喺視頻睇到阿公幫個仔剪臍帶,睇完真係好感動。」

雖然Dicky表示欽敬蘇永康,但就扺死笑說:「最初都驚佢矇查查剪臍帶時,剪錯佢個仔嘅子孫根,點知佢冇剪錯,仲好醒,一手摣鉸剪,一手摣手機拍攝,仲識得zoom in ,成個『妙手仁心』。(BB似邊個?)BB手長腳長,似佢老婆,睇完我即刻放心曬。根據我老婆講,Anita生之前蘇康好有阿公氣勢,但佢個仔出世後,佢啲眼神就變得好溫柔。」Dicky更高呼:「BIG FOUR有後啦!」

兄弟送相機 教極未必識

至於跟太太林文慧身在外地旅遊的Edmond也替阿公開心,Edmond坦言:「佢開頭畀嘅日子唔係20號,我先揀呢段時間離開香港。」他出埠前一晚與阿公兩公婆及成班朋友食飯,一班兄弟送阿公一部相機讓他迎接新生命,清晰錄低這重要時刻,Edmond笑說:「但我哋呢班兄弟反而唔係擔心Anita,係擔心阿蘇生啫,因為佢成世人都係電子器材白癡,阿Mark(雷頌德)好好,全程指導佢,教佢點用,分分鐘條友仔係連memory card都唔識入,阿Mark好細心教佢,但我估佢未必學到曬。」

所以當日Edmond向阿公大潑冷水笑說:「我勸佢唔好製喇,相信佢呢兩日內唔會學識用相機,勸佢用番手機會熟手啲囉!同埋最擔心佢會手騰腳震,驚佢想用相機時又唔識用,又騰騰震,部相機跌咗落唔知邊度就賴嘢!所以尋晚知『公仔』(阿公個仔)出咗嚟後真係好感動,替佢好開心,過兩日返香港會第一時間探『公仔』。」安仔則表示要恭喜阿公,很戥對方開心,因這兩日忙於工作,稍後才去睇BB。

文章轉自:https://hk.celebrity.yahoo.com/蘇永康自拍剪臍帶-dicky-驚佢剪錯子孫根-223024247.html

 

相似文章